Sögu eggjabrauðs má rekja allt til miðalda og er það oft kallað ,,pain doré‘‘ eða gullbrauð. Eggjabrauð eru mjög vinsæl og er það afar mismunandi milli landa hvernig eggjabrauðið er matreitt. Í Portúgal og Brasilíu er djúpsteikt eggjabrauð með kanilsykri borðað á jólunum annað hvort sem ljúffengur morgunmatur eða dásamlegur eftirréttur. Það er því ekki eftir neinu að bíða en að gera vel við sig við fyrsta tækifæri og fá sér gullbrauð hvort sem það sé í morgunmat eða eftirrétt.

Uppskrift fyrir fjóra
Til eru fjölmargar aðferðir til hvernig hægt er að matreiða eggjabrauð. Í grunninn inniheldur hið gómsæta eggjabrauð einungis nokkur hráefni þ.e.a.s. egg, mjólk, kanil og brauð. Við hjá Myllunni bjóðum uppá fjöldan allan af samlokubrauðum sem eru fullkomin í það verk.

• 1 egg
• ½ tsk kanil
• ¼ bolli mjólk
• 4 sneiðar af brauði, t.d Heimilisbrauð, hveiti- eða fjölkorna samlokubrauð Myllunnar.

Þú byrjar á að hræra vel saman saman eggjum, mjólk og kanil á grunnum diski, síðan setur þú brauðið ofan í svo að brauðið dragi í sig blönduna. Mikilvægt er að snúa brauðinu við svo það sé þakið í blöndunni báðu megin. Það eina sem á eftir að gera núna er að steikja brauðið á pönnu uppúr smjöri á miðlungshita þar til eggjabrauðið verður gullinbrúnt. Brauðið á að vera stökkt að utan en mjúkt að innan.

Þar sem grunnuppskriftin er auðveld og fljótleg er kjörið að bæta við hráefnum að eigin vali til þess að gera eggjabrauðið enn betra. Mjög gott er að krydda eggjablönduna með salti, pipar, múskati, vanilludropum, hunangi eða því sem hugurinn girnist. Hægt er að borða eggjabrauðið eitt og sér en við mælum með að bæta við ferskum ávöxtum, sýrópi, kanilsykri eða jafnvel ögn af flórsykri.