Íslenska beyglan er komin aftur í verslanir og við hjá Myllunni höldum áfram að koma fram með hugmyndabanka, því það jafnast fátt á við nýjar, einfaldar og bragðgóðar hugmyndir. Í síðustu viku lögðum við áherslu á litla fólkið á heimilinu, en að þessu sinni ætlum við að huga að yngri kynslóðinni og leggjum áherslu á næringarríkar, einfaldar og bragðgóðar hugmyndir. Oft þarf bara að hugsa aðeins út fyrir boxið, til að geta heimfært klassíska uppskrift og lagað að beyglunni.

Eitt sem við viljum sérstaklega benda á þegar boðið er upp á beyglur og það er að ekki nota beitt áhald til að aðskilja helminga beyglunnar. Best er að þíða beygluna við stofuhita í 20 til 30 mínútur eða lengur áður en helmingar eru aðskildir og beyglan ristuð. Einnig er hægt að setja beygluna í örbylgjuofn á affrystistillingu í u.þ.b. 20 sekúndur (misjafnt eftir ofnum).

Hugmynd fyrir beyglu með hörfræjum, sesam og birki

Beikonbeygla

• 1 beygla með hörfræjum, sesam og birki
• 4 beikonsneiðar
• 4 sneiðar silkiskorin skinka
• Íssalat
• Agúrka
• Tómatar
• Hvítlaukssósa (eftir smekk)

Aðferð:

1. Steikið beikonsneiðarnar á pönnu í u.þ.b. tvær mínútur á hvorri hliðinni, leggið beikonið til hliðar ofan á eldhúspappír til að fjarlægja umframfitu
2. Skerið agúrkuna og tómatana í sneiðar og leggið til hliðar
3. Takið beygluna varlega í sundur og ristið báða helmingana, smyrjið svo hvítlaukssósunni yfir báða beygluhelmingana
4. Setjið íssalatið yfir allan neðri beygluhelminginn og beikonsneiðarnar koma svo ofan á
5. Agúrkan, tómatarnir og silkiskorna skinkan koma í kjölfarið og í lokin er efri beygluhelmingurinn settur á til þess að loka beikonbeyglunni
6. Berið fram og njótið!

Hugmyndir fyrir beyglu með jalapeno og osti

Beygluborgari

• 1 beygla með jalapeno og osti
• 120 grömm hamborgarakjöt
• 4 beikonsneiðar
• 2 ostasneiðar
• Íssalat
• Agúrka
• Paprika
• Eldpipar (chili) majónes
• Krydd af eigin vali (við mælum með: salti, pipar og góðu hamborgarakryddi)

Aðferð:

1. Skerið grænmetið og setjið það til hliðar
2. Steikið beikonsneiðarnar á pönnu í u.þ.b. tvær mínútur á hvorri hliðinni, leggið beikonið til hliðar ofan á eldhúspappír til að fjarlægja umframfitu
3. Steikið hamborgarakjötið á pönnu í u.þ.b. fjórar mínútur, snúið því við, kryddið og bætið ostinum ofan á og steikið áfram í u.þ.b. fjórar mínútur
4. Á meðan hamborgarakjötið er að steikjast á pönnunni takið þið beygluna varlega í sundur og setjið hana í brauðristina
5. Smyrjið báða beygluhelmingana með chili-majónesinu og dreifið íssalatinu yfir allan neðri beygluhelminginn, setjið svo agúrku og papriku ofan á
6. Raðið beikonsneiðunum yfir grænmetið og svo loks bætið hamborgarakjötinu efst
7. Takið efri beygluhelminginn og lokið beygluborgaranum og njótið!

Hugmyndir fyrir fína beyglu

Beyglufranskar

• 1 fín beygla
• 1 ½  matskeið íslenskt smjör
• Sjávarsalt

Aðferð:

1. Kveikið á vöfflujárninu og hitið það upp
2. Takið beygluna varlega í sundur
3. Smyrjið allar hliðar á beyglunni (samtals fjórar)
4. Setjið einn beygluhelminginn á vöfflujárnið og þrýstið niður, haldið niðri í u.þ.b. eina mínútu og endurtakið við hinn beygluhelminginn
5. Skerið svo varlega beygluna í strimla og stráið í lokin sjávarsaltinu yfir og berið fram með góðri sósu, en umfram allt njótið!